@!@ [قصيدة صوتيه] ليه حبك لي معاند @!@

ليه حبك لي معاند وليه تفرح في عنادي=وإنت رمزٍ للتفاني وإنت آيه في البراءه
وإنت فله وإنت نرجس وإنت جوري وإنت كادي=لكن إن جا الأمر عندي صار طبعك به جراءه
اتلذذ يوم أزعل والقهر فيني يقادِ=كن قلبي لك تسالي لو توصِّل للإساءه
يا صغير السن هونك واسمع لصوت المنادي=صوت محتاج لحنانك يشتكي زود انطواءه
عله الدل وعنادك وإنت ماضي في التمادي=وإنت شوقه والهيام و إنت حاءه وإنت باءه
ارحم النار بفؤادي كانه يهمك فؤادي=يا دوى نبضٍ يقولك ما بغا غيرك دواءه
ويا شقى عينٍ تراعي وجفن حاربه السهادِ=يرتجي عطفك ولطفك يا شقاه ويا غباءه
يرتجي مير ان طبعك مختلف بين العبادِ=ناس طيب في نظرهم وبنظر مثلي بلاءه
والبلا إني " أحبك " يا غلاي و يا مرادي=وفوق جفني قد رسمتك والهوى عمري وماءه
قلت لك مليون مره خلني رايق وهادي=فكنا من طبعك اللي علني زود افتراءه
عاند ..ولكن فديتك لا تفكر في اضطهادي=ولا اتناسى من أكون وقلب تجري في دماءه
حن بي .. واعطف .. ولين .. وما يهم من كان بادي= المهم أنا " حبايب " والجفا ناخذ عزاءه